U Venniri Matina è gghiornu chiaru
la matri santa si misi ‘ncamminu!
‘Ncuntrannu a San Giuvanni ppi la via!
Ci dissi: “Unni sta jennu, o matri mia?
Vaiu circannu a Gesu Nazzarenu
ca lu pirdiu e nun lu pozzu acchiari!
Và iti alla casuzza di Pilatu,
lu truviriti ‘nchiusu e ‘ncatinatu!
Tuppì! Tuppì! Cu è ddocu darreri?
Sugnu la to matruzza addulurata!
O cara matri nun vi pozzu apriri
ca li giudei mi teninu ‘ncatinatu!
E iti nti lu mastru di li chiavi
e ni faciti fari un paru a mia!
Maria passau ppi la strata nova
la porta du firraru aperta era!
– – – – – – – – – – – – – – – – – – –
Mastru firraru chi fa apertu astura?
Fazzu na cruci e tri pungenti chiova!
Ti pregu mastru nun li fari ora!
Di novu ti la paju la mastria!
O cara donna nun lu pozzu fari!
Ca unna c’è Gesu ci mettinu a mia!
Nun nni faciti grossi ne pungenti!
Ca ana ppizzari ddi carni nnuccenti!
Ne tanti grossi, ne tanti suttili
ca na pizzari ddi carnuzzi fini.
Maria quannu ‘ntisi sta nuvella
fici scuriri lu suli e la terra!
Ffaccia Maria chi to figghiu passa
ccu na longa catina a lu trapassu!
U venniri matina è gghiornu chiaru
la matri santa si misi ‘ncamminu!