Vinni u’ tempu di fridduri
desiru e’ giudei li banni
li poviri e li signuri
tutti a scrivirisi sinni vanu !
La nanna ti cantirò,
Bambinu dormi e fai la oh !
– Ogni omu o’ so cumannu
ubbidienti si mustraru.
Bittilemmi a ca campia
unni Cesiri abitau.
– San Giuseppe si truvava
a’ Nazaretti ccu Maria,
lu viaggiu cunsidiava
ca va fari ppi dda via.
– Nti ddi gran fridduri estremi
si truvà la Gran Signura,
Bittilemmi a’ la campia
era già arrivata l’ura.
– A San Giuseppi ccu Maria,
ch’è la Vergini Sirata,
a lu friddu e la ilata,
ci scurà mmenzu la strada.
– Quannu Diu nasciu a lu munnu
na nuttata troppu oscura,
a lu diri mi cunfunnu,
ca lu dici la Scrittura.
– Nti dda rigita nuttata,
trona, lampi, acqua e ventu,
a Vergini Sirata,
senza aviri alloggiamentu.
– Chiangi e trema, piccaturi,
e cummoviti d’affettu,
Maria di li fridduri,
va circannu lu rizzettu.
– Ntina povira mangiatura,
partiriu sta Gran Signura,
fìci a Gèsu Bambineddu,
“forma d’omu” puvureddu.
– Pastureddi’ fora fora,
Ci viniti a la capanna?
Nascìu la Vera Luci,
ppi la figghia di S. Anna
– Si parteru li Tri Re,
Tutti tri ‘ncavalleria,
arrivaru a mmenzu a via,
Bittilemmi a la campìa.